فراخ مشويه على الفحم خطوه خطوه من مطبخى بالصور التفصيليه
اهلا بيكم اخواتى من جديد
اقدم لكم اليوم الفراخ المشويه على الفحم خطوه خطوه وبطرقتى اتمنى تنال اعجابكم
طبعا معظم اخواتى فى المنتدى ماشاء الله عليهم متميزات
لكنى ساسرد بعض التفاصيل التى ربما لا تعرفها اخواتنا المبتدأت
نبدأ بسم الله
افضل شىء للفراخ المشويه خصوصا على الفحم انها تكون صغيره عشان تستوى بسرعه والحراره تصل للعمق بسهوله وتستوى كويس
انا ليه طرقتين فى تتبيله الفراخ المشويه على الفحم وكل طريقه ليها طعم مختلف تماما عن الاخرى
الطريقه الاولى مبسطه جدا هى انك تتبلى الفراخ بثوم مفروم وخل العنب وأورجانو وملح وفلفل وعصير ليمون وتنقع الفراخ قبلها بليله وتشوى ثانى يوم ودى طريقه بسيطه جدا وطعم الفراخ مزز فيها
اما طريقه الاخرى هى موضعنا لليوم
اول شى هو ده حجم الفراخ اللى بستعمله للشوى خصوصا على الفحم
حجم كل فرخه 500 جرام او 600 مش اكتر من كده
اول خطوه بفتح الفراخ من الظهر وبالشاكوش اضرب بخفه على الصدر عشان يتبطط وبخفه عشان لحم الصدر ما يتفتت وكمان نضرب عضم الجناحات ليتكسر ويقل ارتفاعه
وارش ملح ولمون واتركهم نص ساعه
كده الفرخه مفتوحه من الظهر زى الكتاب ممكن تتشوى بالشكل ده لكن انا على اخر لحظه قطعتها من النصف لتصبح نصف فرخه بتكون اسهل فى الشوى فى تحركها
بعد النص ساعه طبعا بغسلها كويس جدا جدا عده مرات
وده شكلها جاهز تستقبل التتبيله
التتبيله بقى
زى ماهو موضح فى الصوره
والكميه دى لعدد 6 فرخات ماشاء الله
وعادتا لكل فرخه صغيره بالحجم ده معلقه صغيره ممسوحه ملح
لون الزعفران هو مجرد لتلوين الفراخ انا بحبها متلونه باللون ده
خلطت كل البهارات مع بعضها وضفت نص كوب كاتشب
بعدها فرمت عدد 3 بصلات وراس ثوم كامله وضفت عليهم ربع كوب خل وعصر لمونه فى الكبه وفرمتهم فرم ناعم جدا جدا وضفتهم على البهارات
وده شكل التتبيله بعد ماجهزت
والفراخ من الداخل بسكينه صغيره عملت فيها فتحات بس بدون مايوصل للجلد عشان احتفظ بالجلد سليم
وبعدها تبلت الفراخ كويس فى التتبيله وغمرتها بيها وفى ثنايا الجدل واللحم والفتحات اللى عملتها
وتركتها فى التلاجه قبلها بليله
ووقت الشوى نزيل عنها التتبيله قبل وضعها على الشوايه
الصوره فيها كفته لانى شويت كفته معاها وهزل الطريقة في الموضوع القادم ان شاء الله
لكل سؤال أو إضافة، يرجى كتابة تعليقك في الخانة اسفله