اسرار المضيفات

اسرار المضيفات

 شغلانة المضيفين مش بس تقديم الأكل و الترحيب بالمسافرين على الطياره , هما كمان مسؤولين عن سلامة كل الركاب , و الأهم من ده انهم يعرفوا أسرار عن الطياره مسافرين كتير مايعرفوهاش , دي بعض الأسرار من المضيفين مباشرة كتير مننا ما يعرفهاش و بتحصل وراء الكواليس على ارتفاع 38 الف قدم .

• تعرف ان المخدات و البطانيات على الطياره بيكونوا غالبا مستعملين قبل كده و مش جداد , أفضل حل انك لما تسألهم على بطانيه تسأل على واحده جديده في الكيس على الأقل حتضمن انها مغسولة بعد الاستخدام .

• لو حتشرب مياه على الطياره اتاكد انها من ازازة مقفوله أفضل

• تعرف أن أقذر مكان على الطياره هو الستاند اللي أدامك اللي الناس بتاكل عليها , لأن نادرا ما بيتم تنظيفه و بيكون عليه كمية ميكروبات و باكتيريا رهيبه , فنصيحه لو معاك أطفال قبل ما تستخدم الستاند ده أتأكد انك مسحته كويس بمناديل مبلله ( ديتول )

• الحمام ( حدث و لا حرج ) , تعرف ان المضيفين نادرا جدا لما بيستخدموا حمامات الطيارات , و بيستخدموها فقط لو حيغسلوا ايديهم , و لو الرحله قصيره بيفضلوا ينتظروا لحد الوصول و يدخلوا الحمام في المطار , و بيحترموا أوي المسافر اللي بيهتم ان يرمي كل الكلينكس في المكان المخصص و يستخدم السيفون , و ينظف مكانه قبل ما يطلع .

• تعرف أن المضيفين بياخدوا راتبهم مقابل عدد ساعات الطيران اللي بيطيروها في الجو فقط بشرط ان يكون باب الطياره اتقفل بالفعل , يعني طول وقت التحميل و الانتظار أو الصيانه و باب الطياره مفتوح مش بياخدوا عليه أي فلوس ( لأن لازم يتم تحقيق عدد ساعات طيران معينه ) و أول ما باب الطياره يتقفل الحسابه تبدأ تحسب

• أسوء وقت تدخل فيه الحمام عند هبوط الطياره , تعرف أن الطيار ميقدرش يعمل هبوط لو فيه حد في لسه في الحمام و بيظطر انه يوقف الطياره في الجو لحد ما الاستاذ يتفضل و يطلع من الحمام و يربط الحزام , و ده ممكن يسبب ان الطياره كلها تتاخر عن مواعيد وصولها .
• لو شفت مضيف بيجري علشان يلحق طياره , متتوقعش انه متأخر عن موعد وصوله , ده غالبا بيكون بيغطي مكان المضيف الأصلي اللي كان مفروض يطلع على الطياره , عادة بيكون فيه مضيف أو اتنين لكل شركة ستاند باي في المطار علشان لو فيه مضيف موصلش لسبب أو لاخر قبل الاقلاع , المضيف الاحتياطي بيكون مستعد و يطلع مكان زميله
• تعرف أن المضيفين مش بياكلوا من الأكل اللي بيتقدملنا على الطياره , و بيكون ليهم أكل معمولهم مخصوص , و بيكون اكيد أفضل من تشيكن اور مييت ( chicken or meat ) اللي مافيش غيرهم في كل رحلة .